Clos nad laighe

Clos nad laighe
Socraich, is èist ris an rann
Tha a’ Chailleach
Maille ri fèidh thar nam beann

Cha tig ann sluagh nam marbh
Cha tig ann sluagh an sìth’
‘S nì bhios gann glaistigean garbh’
‘S iad fo bhonn Chaluim is Brìghd’

Na bi ort acras no pathadh
Na bi ort eagal no bròn
‘S mis’ tha toirt dhutsa an gealladh:
Bidh muir rèidh agad fo shròin

Cadal ciùin dhut fad na h-oidhche
Caomh mar thuinn bheaga na tràghad
Cha bhi dhuinn sgàil de throm-laighe:
Bidh mo ghaol ortsa gu bràth

Dhùin an sùil bha aig an fhamhair,
Sùil a chuir gaisgeach san speur
‘S ùidh Aonghuis suirghe na eala
‘S rùn na h-oidhch’ lasair na cèir’

Tha bò fhionn am broinn na tobair
‘S iasg mòr, sionn, tapaidh an còrr
‘S coille bhionn leigeil a cnothan
Os a chionn, is gabhaidh e leòr

Dùisgidh Fionn a bha na chadal
Rùisgear lann ‘s buailear trost
Fosglar tuim anns a bheil bathar
Togar fonn mach às an tost

Èiridh craobh far a bheil monadh
Fàsaidh fraoch far a bheil sràid
Sèididh gaoth laoimeadh nan lonach
‘S gèillidh baoth-chreideamh na stàit’

Clos nad laighe
Nach leig thu sìos do cheann
Tha a’ Chailleach
Bleoghainn nam fiadh thar nam beann